Monday, March 7, 2016

പ്രേമികളുടെ ജനനം.

നീ എന്നുച്ചരിക്കുമ്പോൾ
 ഞാൻ കണ്ടെത്തുന്നൊരനുഭൂതിയുണ്ട്,
സമുദ്രം കണ്ടിട്ടില്ലാത്ത നദി
കാലങ്ങളലഞ്ഞ്
കടലോടു ചേർന്ന പൂർണ്ണത!

ഞാനുരുകുമ്പോൾ,
ശൂന്യതയിൽ,
നീ വരുന്നു,
നാമൊരുമിച്ചു പാടുന്നു, 

നൃത്തം ചെയ്യുന്നു,
 പെയ്യാനിരിക്കുന്ന മേഘങ്ങളുടെ സംഗീതം കൊണ്ട്
എന്നെ
നീ അതിശയിപ്പിക്കുന്നു,
നല്ല പാട്ടുകാരാ,

ഞാൻ നിന്നിൽ കുരുങ്ങിക്കിടക്കുന്നു.

നീ പോകാനൊരുങ്ങുമ്പോൾ,
ഇത്രമേൽ സങ്കീർണ്ണമായ വേദന,
എന്നിലെന്തിനെന്ന്
ഞാൻ കയർക്കുന്നു.
നീ ചിരിക്കുന്നു,
എന്നിൽ
അത് അട്ടഹാസം പോലെ പ്രതിധ്വനിക്കുന്നു.


നിന്നെ പകർന്നു കിട്ടിയ വേളകൾ
മൃദുചുംബനങ്ങൾ കൊണ്ട് ഞാൻ ചുവപ്പിക്കുന്നു, 
നിന്നിൽ നിന്നു മോചിപ്പിക്കപ്പെടാതെ
ഞാൻ സ്നേഹിക്കപ്പെടട്ടെ, 

ഞാൻ നിന്നെ പ്രതിരോധിക്കുന്നില്ല!
(ചിത്രം ഇവിടെ നിന്ന് : https://www.pinterest.com/pin/283375001529870935/ )

No comments:

Post a Comment

Your comments here