Tuesday, March 8, 2016

വലിയ വട്ടങ്ങൾ.

നിശബ്ദതയിലൂടെ നടക്കുന്ന
യക്ഷികളുടെ നിറമെന്താണ്?
അവർക്ക്
ചുണ്ടിൽ ചുവപ്പു തേച്ച
വിശപ്പുകളുണ്ടോ?
വെയിൽ പുതച്ചുകൊണ്ട്‌
ആരെങ്കിലും
അവരോട്
കഥകൾ പറയാറുണ്ടോ?
ആ കഥകളിൽ
പൊട്ടുവച്ച്
പകൽ വെളിപ്പിക്കുന്ന
പെൺ യൗവ്വനങ്ങൾ
വലിയ വൃത്തങ്ങൾ
വരക്കാറുണ്ടോ?
അവർ
മേലങ്കികൾ ധരിച്ചിട്ടുണ്ടോ?
അവരെ അവർ
അതിനു പിന്നിൽ
മറച്ചു പിടിച്ചിട്ടുണ്ടോ?
അവരുടെ
സ്വാതന്ത്ര്യത്തിനു ചുറ്റും
തെരുവിലെ ഏതോ
പൊളിഞ്ഞുവീഴാറായ ദാബയിൽ
വിളമ്പി വച്ചിരിക്കുന്ന
പഴകിയ ഭക്ഷണത്തിലെന്ന പോലെ
ഈച്ചകൾ ആർക്കുന്നുണ്ടോ?
 
ചുറ്റുമതിൽ കെട്ടിയ
വക്കുപൊട്ടിയൊരു ഭൂപടത്തിൽ,
പുറങ്കാഴ്ചകൾ
മൂടുപടം പോലെ അവരെ
വലയം ചെയ്തിരിക്കുന്നു,

കേട്ടുകേൾവികൾ
കടും ചുവപ്പുകൊടുത്ത
ഏതോ ഋതുവിൽ,
മുടിക്കെട്ടിലെ
കൊഴിഞ്ഞ പൂവുമാത്രമായ്,
ഓരോ യക്ഷിയും
പെണ്ണുടലിനെ
പ്രാപിക്കുന്നു,
പേരിടാത്ത പ്രണയ ചുംബനങ്ങൾ
മണ്ണിലേക്കു പൊഴിഞ്ഞു വീഴുന്നു,
തോരാത്ത പെൺമഴകളെന്നു നാമതിനെ പേരിടുന്നു!

2 comments:

  1. ചുവപ്പുകൊടുത്ത
    ഏതോ ഋതുവിൽ,
    മുടിക്കെട്ടിലെ
    കൊഴിഞ്ഞ പൂവുമാത്രമായ്,
    ഓരോ യക്ഷിയും
    പെണ്ണുടലിനെ
    പ്രാപിക്കുന്നു,



    കൊള്ളാം ഒരു പുതുമയുണ്ട്‌!ഽ/!!

    ReplyDelete
    Replies
    1. നന്ദി സുഹൃത്തേ.. :)

      Delete

Your comments here