Monday, September 19, 2016

നീ വരികൾ.

     -1- 
നീ മരമാവേ
ഞാൻ വേരായി.
നീ മണമാവേ
ഞാൻ ഇലയായി.
ഇരുവസന്തങ്ങൾ തേടി ഒരുമരം,
ഇലപൊഴിച്ചുന്മത്തരായ് നാമിരുപേർ!

     -2-

നീ നിഴലാകുമ്പോൾ മാത്രം
നിറംവയ്ക്കുന്നെന്റെ ഉള്ളുമ്മകൾ.
നീ നനവാകുമ്പോൾ മാത്രം
നാണമെറിയുന്നെന്റെ കണ്ണിണകൾ.
നിന്റെ നെഞ്ചിൽ
എന്റെ കടൽ തിളയ്ക്കുന്നുണ്ട്.
ചുവന്ന പൂക്കളെത്തേടി ഒരുമരം
ഇനിയുമെന്റെ ചുണ്ടിലിരുപ്പാണ്,
വേനലുംകൊണ്ട് നീ വരുവോളം!

     -3-

വസന്തങ്ങൾ വന്നുപോകുമ്പോൾ
നീ ശലഭവും
ഞാൻ ആകാശവുമാകുന്നതിനെക്കുറിച്ച്
നീ എന്തുപറയുന്നു?

     -4-

പാതികൂമ്പിയ നിന്റെ കണ്ണുകളിലെവിടെയോ
എന്റെ പകൽ ചായുന്നുണ്ട്,
രാവേറെ കഥകൾ പറയാൻ..

     -5-

നീ എന്റെ മുടിയിഴയിലൊളിക്കുന്ന മുഖം.
ഞാൻ
നിന്റെ ശ്വാസമേറ്റേറെപ്പൂത്തുപോയൊരു
പൂമരം!

     -6-

കടലസ്തമിക്കുന്നിടത്താണ്
നീയുദിക്കുന്നത്.
നിലാവുകൊണ്ടെന്നെ പുതപ്പിക്കുന്ന
നിന്റെ വിരുന്നുതേടി,
ഞാനൊരു തിരയാകുന്നിടം!

     -7-

രാവണഞ്ഞിട്ടും
മരം നനഞ്ഞിട്ടും
പെയ്തുതോരാതെ നമ്മൾ,
പ്രണയിച്ചുതീരാത്ത നമ്മൾ!

     -8-

നീ നൃത്തം ചെയ്യുമ്പോൾ
അലങ്കാരങ്ങൾ അഴിച്ചുവച്ച്
എന്റെ ശരീരമിതാ സ്നേഹം വിളമ്പുന്നു,

ആത്മാവിലെ എരിവുകൊണ്ടു നാം
മുറിപ്പെടുന്നു!

     -9-

നിന്റെ വിരൽ ചുവന്നെന്റെ
ഹൃദയത്തിലേയ്‌ക്കൊരു തുള്ളി.
സ്നേഹം വിയർത്തെന്റെ
വറ്റുപാത്രത്തിലൊരു പരൽ.
നാമിറ്റിയ ഭ്രാന്തുകളുടെ രുചി പകുക്കുമ്പോൾ,
പ്രിയപ്പെട്ടവനേ,
നീ എനിയ്ക്കുപ്പാകുന്നു!

(ചിത്രം ഇവിടെ നിന്ന് : https://mixedmediaartistsinternational.blogspot.in/2011_07_01_archive.html )

4 comments:


  1. നീയും ഞാനും.... അതിനപ്പുറം പോകുന്നില്ല. കവിതയും കുറവ്

    ReplyDelete
    Replies
    1. :)നന്നാക്കാൻ ശ്രമിക്കാം..

      Delete

Your comments here